– Што можа быць прыемней для пiсьменнiка? Таму што Радзiма заўсёды была невычэрпным вытокам натхнення, а малая – дарагiм куточкам, думка пра якi вярэдзiць сэрца пачуццём любовi i тугi. I таму нi адзін з гродзенскiх пiсьменнiкаў не абышоў гэтую тэму, – адзначае пісьменніца.
І сапраўды. У альманаху – багата твораў і імён. Знайшлося ў ім месца і творчасці гасцей, сярод якіх паэтэса Алена Карнеева з Разані, польскія паэты Аляксандр Наўроцкі і Барбара Юркоўска. Прадстаўлены ў выданні працы лаўрэатаў прэміі імя Аляксандра Дубко «За творчыя дасягненні ў галіне культуры і мастацтва» ў намінацыях «Пісьменнік года-2016» і «Пісьменнік года-2017». Гэта артыкулы краязнаўцы з Карэлiчаў Святланы Кошур i нарысы музычнага крытыка, публiцыста Віталiя Радзівонава.
Доўгія гады самай аб'ёмнай застаецца рубрыка «Паэзія». На гэтых старонках чытач знойдзе вершы паэтаў з усіх куточкаў Гродзеншчыны. Не меншую цікавасць вызываюць іншыя раздзелы, у якіх прадстаўлены дзіцячая літаратура, публiцыстыка i краязнаўства, лiтаратуразнаўства i крытыка.
Цікава, што на працягу некалькіх апошніх нумароў альманаха заўважна адна паказальная тэндэнцыя: творцы імкнуцца праявіць сябе ў розных напрамках літаратуры. Напрыклад, паэты Анатоль Апанасевіч i Ала Клемянок гэтым разам выступаюць як празаікi. А краязнаўца Валерый Чарапіца ў сваім матэрыяле пра гродзенскіх паэтаў міжваеннага перыяду паўстае ў амплуа літаратуразнаўца, Алена Руцкая прапаноўвае свае творы для дзяцей.
Аднак да якога б жанру ні звярталіся нашы аўтары, вытокам натхнення для кожнага з іх застаецца вобраз малой радзімы.
Як расказалі ў гродзенскай пісьменніцкай арганізацыі, выхад альманаха “На Нёманскай хвалі” стаў магчымым дзякуючы спонсарскай дапамозе СВК “Свіслач” Гродзенскага раёна.
Пазнаёміцца з новым выданнем можна ў абласной навуковай бібліятэцы імя Я. Карскага. Таксама плануюцца прэзентацыі і яго распаўсюджванне ва ўстановах культуры і адукацыі Гродна і вобласці.